Риза ФАЗЫЛ

УЯН, ТАТАР!..

Къазан татар шаири

Рафис Къурбангъа такълид.

Кунеш догъды, нур септи,

Табиат уянды энди.

Уян, татар, уян сен!

Уянмакъ вакъты кельди.

Ач козюнъни, юкълама,

Ят гуллерни къокълама.

Халкъынъ кеткен ёлундан

Тек огге юрь, токътама!

Токътадынъмы –  унсурлар

Аякъ чалар ишинъе.

Эр адымда иссе къош

Умумхалкъ енъишине.

Ач козюнъни, бакъ , дейим,

Нелер ола этрафта.

Козюмизнинъ огюнде

Ана тиль ёкъ олмакъта.

Къайтып кельдик Ватангъа,

Юрт бизге къучакъ керди.

Уян, татар, уян сен!

Уянмакъ вакъты кельди.

Уянмасакъ юкъудан,

Макъсадымыз – тюш олур.

Биз фурсатны къачырсакъ,

Ёлун тапмакъ кучь олур.

Ана тильге япышсын

Эр къоранта, эр Ана.

Ана тильни эмсинлер

Сабийлер къана-къана.

Яш несильге Ана тиль

Ана сютюнен кирмесе,

Сонъундан о, билинъ ки,

Тана сыртынен кирмез.

Тилимизнинъ такъдири

Олсун эр кеснинъ дерди.

Уян, татар, уян сен!

Уянмакъ вакъты кельди.