Къырымтатар тилининъ зенгинлиги, шырныкълыгъы онынъ эсасен къырым-къыпчакъ темелиндедир. Темели къавий иншаат эбедий йыкъылмаз, эп къавийлешир. Догъру айтасыз, Сафуре ханым, шивелер тильнинъ зийнетидир, дер эдим. Лякин тилимизнинъ тамырлары даа теренге кете ве бу онынъ къыпчакъ ве огъуз тамырларыдыр. Мен озь макъалемде: "Къырымтатар тили эки ананы эме, эки тамырдан: къыпчакъ ве огъуз тамырларындан гъыда ала", деп язгъан эдим ве шу фикирде де турам. Ана тилимиз бизим гъурурымыз. 

 

 КЪЫРЫМТАТАР ТИЛИ

Эр тильнинъ бар озьджесине

Гузеллиги, тувгъан или.

Къырым ярым адасындай

Дюльбер къырымтатар тили.

Джыйынларда чынъ айткъанда,

Тиль сынайлар къызлар биле.

Келинчекдай гуль чырайлы

Гузель къырымтатар тили.

Халкъынъ киби джесюрсинъ сен,

Ишлейсинъ кучь-гъайрет иле.

Гурьлеп акъкъан Салгъырдайын

Эпкин къырымтатар тили.

Асырларны кечип кельген

Энъ къадимий тюркий тили,

Ханлар санъа седжде эткен

Магърур къырымтатар тили.

Ашыкъ Умер сазын чалып,

Кезген йырлап сенинъ иле.

Ашыкъларны мефтюн эткен

Отькюр къырымтатар тили.

Тильнинъ къурты Чобан-заде

Къуршунларнен атылса да,

Сени макътап язды даим,

Озьгюн къырымтатар тили.

Шемьи-заде киби санъа

Эйкель тиккен шаир биле

Тоялмады леззетинъе,

Татлы къырымтатар тили.

Кок батыры Амет-Хан да

Йыр уйдурып йырлай эди.

Джошкъун йыргъа пек келишкен

Зенгин къырымтатар тили.

Атсалар да, йыкъсалар да,

Йыкъылмадынъ халкъынъ иле.

Ёкъ олмадынъ, къавий турдынъ,

Джесюр къырымтатар тили.

Таптаса да сени къыймай

Сюрьгюнликнинъ афат ели,

Халкънен бирге курештинъ сен,

Батыр къырымтатар тили.

“Татарлыгъым, тувгъан ерим!”,

Деп йырлагъан неслим, илим.

Олер – сенден халкъ вазгечмез,

Ольмез къырымтатар тили.

Эй, Ана тиль, биз огюнъде

Тиз чёкемиз биле-биле.

Онъгъанынъны корьсе эдик,

Азиз къырымтатар тили.