вторник, 26 января 2016 г.



Халкънынъ омюри – онынъ тилинде.
Тилинъизни, козь бебеги киби сакъланъыз.
Ана тилимизни, эдждатларымызнынъ тилини сакълайыкъ.

ЯЛВАРАМАН!

Эй, Ватангъа келип, мында
Ватан сувун ичкенлер!
“Ватаным!” деп, “Ватаным!” деп,
Ана-Юрткъа кочькенлер!

Эдждатларынъ тамыр аткъан
Бу мукъаддес топракъта
Янъы несиль эвлятларын
Осьтюрерсиз мытлакъа.

“Янъы дюнья” корьген сайын,
Къуванаман юректен.
Гъурурлана, сукъланаман
Бакъып, бакъып эректен.

Артсын, артсын миллетимиз,
Артсын, арты гурь олсын!
Яш несильни осьтюрювде
Макъсадымыз бир олсын.

Эр бир янъы догъгъан сабий
Озь тилинде сёйленсин.
“Анам! Анам!”, “Бабам!” десин,
“Мама”, “Папа”, демесин!

Ялвараман сизге, джаным,
Ватандашым, юртдашым!
Буюк олсанъ, агъам, дейим,
Кучюк олсанъ — къардашым!

Бильмесенъиз Ана тилин
Огренинъиз, билинъиз!
Баланъызнынъ козь яшыны
Ана тильде силинъиз.

Ялвараман! Ялвараман,
Огюнъизде тиз чёкип!
Баланъызгъа: “Балам!” денъиз,
Козьчиклеринден опип.

“Балам, балам, бал татырым!”
Десенъиз, о бал татыр.
Акс алда: “Мама! Мам...!” деп,
Озь-озюни алдатыр.

Тувгъанларым, ялвараман!
Къартбабалар, бабалар,
Эвлядычюн джан куйдирген
Къартаналар, аналар!

Къартлар, яшлар, къырджыманлар,
Келинчеклер, келинлер!
Баламызнен Ана тильде
Сёйлешейик, келинълер!

Яврунъызгъа Ана тили
Ана сютинен кирсин.
Оськен сонъ да озь тилининъ
Къадирини шай бильсин.

Яврунъызгъа Ана тилин
Ашламакътан талманъыз.
Мектепте де Ана тили
Дерслеринден къалманъыз.

Джаным-джаным сабийлерни
Джарты-сакъав этмейик!
Заманнынъ терс акъымына
Биз алданып кетмейик!

Фырсат барда, эр имкяндан
Файдаланып къалайыкъ.
Газет, китап, журнал окъуп,
Куньде бир дерс алайыкъ.

Мен бир эсли, къарт гевезе —
Агъыр алманъ сёзюмни.
Тиль ахвалын коре, биле,
Туталмайман озюмни.

Ялвараман, тилинъизге
Гъает мукъайт олынъыз!
Ана тильге мейиль беринъ,
Айдын олсын ёлынъыз!







Комментариев нет:

Отправить комментарий