Тилимизнинъ зенгинлиги — Халкъ агъыз яратыджылыгънда 

 Къырымтатар аталар сёзлери

ВАТАН ВЕ ВАТАНПЕРВЕРЛИК АКЪКЪЫНДА

Ана юртынъ — алтын бешик.

Ватан — экинджи ананъ.

Ватансыз адам — йырсыз бульбуль.

Ат айланыр, къазыгъына байланыр.

Ватан севгиси — севгилернинъ энъ буюгидир.

Бульбульни алтын къафесте тутсанъ да, гуль терегини сагъыныр.

Эр кеске озь Ватаны татлы.

Гъурбетлик гульни солдырыр.

Къушнынъ да тувгъан ювасы бар.

Тиз чёкин яшагъандже, тик турып оль.

Бодененинъ эви ёкъ, къайда барса — пипылдакъ.

Ватангъа хызмет эткенинъ — озюнъе хызмет эткенинъ.

Тувгъан ильнинъ ери — дженнет, сувы — шербет.

Эски юртнынъ къадири янъысында билинир.

Ана юртынъ аман олса, тюс-чырайынъ сарармаз.

Юрты байнынъ озю бай.

Бульбульге алтын къафес биле зиндандыр.

Эр къуш озь ювасыны бегенир.

Эр гуль озь пытагъында ачар.

Бакъа — батагъына, балыкъ — голюне.

Ватан ичюн откъа тюшсенъ, янмазсынъ.

Ватанына хиянет эткен, озь анасына хиянет этер.

Къаплыбакъа да озь къабына бакъып:

— Озь эвим, озь сарайым, — деген.

Уриет гулюни къопаргъан,

Япрагъыны да тюшюрмез.

Тувгъан ана — бир,

Тувгъан Ватан — бир.

Башкъа ильнинъ султаны олгъандже,

Озь илинънинъ чобаны ол.

Ана киби яр олмаз,

Ватан киби ер олмаз.

Ватан — догъмуш ананъ исе,

Гъурбет иль — огий ананъ.

Ишинъ Ватан огърунда исе,

Бабанънынъ да хатрини сайма.

Ярындан айрылгъан еди йыл агълар,

Ватанындан айрылгъан ольгендже агълар.